ขึ้น/แรม ๒ ค่ำ

ขึ้น/แรม ๒ ค่ำ

 เขมาเขมะสะระณะคะมะนะปะริทีปิกาคาถา

พะหุง  เว สะระณัง  ยันติ            
ปัพพะตานิ  วะนานิ จะ,
อารามะรุกขะเจตยานิ                         
มะนุสสา  ภะยะตัชชิตา,
เนตัง  โข สะระณัง  เขมัง           
เนตัง  สะระณะมุตตะมัง,
เนตัง  สะระณะมาคัมมะ                       
สัพพะทุกขา  ปะมุจจะติ,
โย  จะ พุทธัญจะ  ธัมมัญจะ          
สังฆัญจะ  สะระณัง คะโต,
จัตตาริ  อะริยะสัจจานิ                           
สัมมัปปัญญายะ  ปัสสะติ,
ทุกขัง  ทุกขะสะมุปปาทัง                     
ทุกขัสสะ  จะ อะติกกะมัง,
อะริยัญจัฏฐังคิกัง  มัคคัง         
ทุกขูปะสะมะคามินัง,
เอตัง  โข สะระณัง  เขมัง            
เอตัง   สะระณะมุตตะมัง,
เอตัง  สะระณะมะคัมมะ                         
สัพพะทุกขา  ปะมุจจะตีติ.

ระตะนะสุตตัง

ยานีธะ ภูตานิ สะมาคะตานิ,
ภุมมานิ วา ยานิวะ อันตะลิกเข,
สัพเพ วะ ภูตา สุมะนา ภะวันตุ,
อะโถปิ สักกัจจะ สุณันตุ ภาสิตัง,
ตัส๎มา หิ ภูตา นิสาเมถะ สัพเพ,
เมตตัง กะโรถะ มานุสิยา ปะชายะ,
ทิวา จะ รัตโต จะ หะรันติ เย พะลิง,
ตัส๎มา หิ เน รักขะถะ อัปปะมัตตา ฯ
ยังกิญจิ วิตตัง อิธะ วา หุรัง วา,
สัคเคสุ วา ยัง ระตะนัง ปะณีตัง,
นะ โน สะมัง อัตถิ ตะถาคะเตนะ,
อิทัมปิ พุทเธ ระตะนัง ปะณีตัง,
เอเตนะ สัจเจนะ สุวัตถิ โหตุ ฯ
ขะยัง วิราคัง อะมะตัง ปะณีตัง,
ยะทัชฌะคา สัก๎ยะมุนี สะมาหิโต,
นะ เตนะ ธัมเมนะ สะมัตถิ กิญจิ,
อิทัมปิ ธัมเม ระตะนัง ปะณีตัง,
เอเตนะ สัจเจนะ สุวัตถิ โหตุ ฯ
ยัมพุทธะเสฏโฐ ปะริวัณณะยี สุจิง,
สะมาธิมานันตะริกัญญะมาหุ,
สะมาธินา เตนะ สะโม นะ วิชชะติ,
อิทัมปิ ธัมเม ระตะนัง ปะณีตัง,
เอเตนะ สัจเจนะ สุวัตถิ โหตุ ฯ
เย ปุคคะลา อัฏฐะ สะตัง ปะสัฏฐา,
จัตตาริ เอตานิ ยุคานิ โหนติ,
เต ทักขิเณยยา สุคะตัสสะ สาวะกา,
เอเตสุ ทินนานิ มะหัปผะลานิ,
อิทัมปิ สังเฆ ระตะนัง ปะณีตัง,
เอเตนะ สัจเจนะ สุวัตถิ โหตุ ฯ
เย สุปปะยุตตา มะนะสา ทัฬเหนะ,
นิกกามิโน โคตะมะสาสะนัมหิ,
เต ปัตติปัตตา อะมะตัง วิคัยหะ,
ลัทธา มุธา นิพพุติง ภุญชะมานา,
อิทัมปิ สังเฆ ระตะนัง ปะณีตัง,
เอเตนะ สัจเจนะ สุวัตถิ โหตุ ฯ
ยะถินทะขีโล ปะฐะวิง สิโต สิยา,
จะตุพภิ วาเตภิ อะสัมปะกัมปิโย,
ตะถูปะมัง สัปปุริสัง วะทามิ,
โย อะริยะสัจจานิ อะเวจจะ ปัสสะติ,
อิทัมปิ สังเฆ ระตะนัง ปะณีตัง,
เอเตนะ สัจเจนะ สุวัตถิ โหตุ ฯ
เย อะริยะสัจจานิ วิภาวะยันติ,
คัมภีระปัญเญนะ สุเทสิตานิ,
กิญจาปิ เต โหนติ ภุสัปปะมัตตา,
นะ เต ภะวัง อัฏฐะมะมาทิยันติ,
อิทัมปิ สังเฆ ระตะนัง ปะณีตัง,
เอเตนะ สัจเจนะ สุวัตถิ โหตุ ฯ
สะหาวัสสะ ทัสสะนะสัมปะทายะ,
ตะยัสสุ ธัมมา ชะหิตา ภะวันติ,
สักกายะทิฏฐิ วิจิกิจฉิตัญจะ,
สีลัพพะตัง วาปิ ยะทัตถิ กิญจิ,
จะตูหะปาเยหิ จะ วิปปะมุตโต,
ฉะ จาภิฐานานิ อะภัพโพ กาตุง,
อิทัมปิ สังเฆ ระตะนัง ปะณีตัง,
เอเตนะ สัจเจนะ สุวัตถิ โหตุ ฯ
กิญจาปิ โส กัมมัง กะโรติ ปาปะตัง,
กาเยนะ วาจายุทะ เจตะสา วา,
อะภัพโพ โส ตัสสะ ปะฏิจฉะทายะ,
อะภัพพะตา ทิฏฐะปะทัสสะ วุตตา,
อิทัมปิ สังเฆ ระตะนัง ปะณีตัง,
เอเตนะ สัจเจนะ สุวัตถิ โหตุ ฯ
วะนัปปะคุมเพ ยะถา ผุสสิตัคเค,
คิมหานะมาเส ปะฐะมัส๎มิง คิมเห,
ตะถูปะมัง ธัมมะวะรัง อะเทสะยิ,
นิพพานะคามิง ปะระมัง หิตายะ,
อิทัมปิ พุทเธ ระตะนัง ปะณีตัง,
เอเตนะ สัจเจนะ สุวัตถิ โหตุ ฯ
วะโร วะรัญญู วะระโท วะราหะโร,
อะนุตตะโร ธัมมะวะรัง อะเทสะยิ,
อิทัมปิ พุทเธ ระตะนัง ปะณีตัง,
เอเตนะ สัจเจนะ สุวัตถิ โหตุ ฯ
ขีณัง ปุราณัง นะวัง นัตถิ สัมภะวัง,
วิรัตตะจิตตายะติเก ภะวัส๎มิง,
เต ขีณะพีชา อะวิรุฬหิฉันทา,
นิพพันติ ธีรา ยะถายัมปะทีโป,
อิทัปมิ สังเฆ ระตะนัง ปะณีตัง,
เอเตนะ สัจเจนะ สุวัตถิ โหตุ ฯ
ยานีธะ ภูตานิ สะมาคะตานิ,
ภุมมานิ วา ยานิวะ อันตะลิกเข,
ตะถาคะตัง เทวะมะนุสสะปูชิตัง,
พุทธัง นะมัสสามะ สุวัตถิ โหตุ ฯ
ยานีธะ ภูตานิ สะมาคะตานิ,
ภุมมานิ วา ยานิวะ อันตะลิกเข,
ตะถาคะตัง เทวะมะนุสสะปูชิตัง,
ธัมมัง นะมัสสามะ สุวัตถิ โหตุ ฯ
ยานีธะ ภูตานิ สะมาคะตานิ,
ภุมมานิ วา ยานิวะ อันตะลิกเข,
ตะถาคะตัง เทวะมะนุสสะปูชิตัง,
สังฆัง นะมัสสามะ สุวัตถิ โหตุ ฯ

กะระณียะเมตตะสุตตัง

กะระณียะมัตถะกุสะเลนะ
ยันตัง สันตัง ปะทัง อะภิสะเมจจะ,
สักโก อุชู จะ สุหุชู จะ
สุวะโจ จัสสะ มุทุ อะนะติมานี,
สันตุสสะโก จะ สุภะโร จะ
อัปปะกิจโจ จะ สัลละหุกะวุตติ,
สันตินท๎ริโย จะ นิปะโก จะ
อัปปะคัพโภ กุเลสุ อะนะนุคิทโธ,
นะ จะ ขุททัง สะมาจะเร กิญจิ
เยนะ วิญญู ปะเร อุปะวะเทยยุง,
สุขิโน วา เขมิโน โหตุ
สัพเพ สัตตา ภะวันตุ สุขิตัตตา,
เย เกจิ ปาณะภูตัตถิ
ตะสา วา ถาวะรา วา อะนะวะเสสา,
ทีฆา วา เย มะหันตา วา
มัชฌิยา รัสสะกา อะณุกะถูลา,
ทิฏฐา วา เย จะ อะทิฏฐา
เย จะ ทูเร วะสันติ อะวิทูเร,
ภูตา วา สัมภะเวสี วา
สัพเพ สัตตา ภะวันตุ สุขิตัตตา,
นะ ปะโร ปะรัง นิกุพเพถะ
นาติมัญเญถะ กัตถะจิ นัง กิญจิ,
พยาโรสะนา ปะฏีฆะสัญญา
นาญญะมัญญัสสะ ทุกขะมิจเฉยยะ,
มาตา ยะถา นิยัง ปุตตัง
อายุสา เอกะปุตตะมะนุรักเข,
เอวัมปิ สัพพะภุเตสุ
มานะสัมภาวะเย อะปะริมาณัง,
 เมตตัญจะ สัพพะโลกัส๎มิง
มานะสัมภาวะเย อะปะริมาณัง,
อุทธัง อะโธ จะ ติริยัญจะ
อะสัมพาธัง อะเวรัง อะสะปัตตัง,
ติฏฐัญจะรัง นิสินโน วา
สะยาโน วา ยาวะตัสสะ วิคะตะมิทโธ,
เอตัง สะติง อะธิฏเฐยยะ
พ๎รัห๎มะเมตัง วิหารัง อิธะมาหุ,
ทิฏฐิญจะ อะนุปะคัมมะ สีละวา
ทัสสะเนนะ สัมปันโน,
กาเมสุ วิเนยยะ เคธัง
นะ หิ ชาตุ คัพภะเสยยัง ปุนะเรตีติฯ

ขันธะปะริตตะคาถา

วิรูปักเขหิ เม เมตตัง
เมตตัง เอราปะเถหิ เม,
ฉัพยาปุตเตหิ เม เมตตัง
เมตตัง กัณหาโคตะมะเกหิ จะ,
อะปาทะเกหิ เม เมตตัง
เมตตัง ทิปาทะเกหิ เม,
จะตุปปะเทหิ เม เมตตัง
เมตตัง พะหุปปะเทหิ เม,
มา มัง อะปาทะโก หิงสิ
มา มัง หิงสิ ทิปาทะโก,
มา มัง จะตุปปะโท หิงสิ
มา มัง หิงสิ พะหุปปะโท,
สัพเพ สัตตา สัพเพ ปาณา
สัพเพ ภูตา จะ เกวะลา,
สัพเพ ภัทรานิ ปัสสันตุ
มา กิญจิ ปาปะมาคะมา,
อัปปะมาโณ พุทโธ, อัปปะมาโณ ธัมโม, อัปปะมาโณ สังโฆ, ปะมาณะวันตานิ สิริงสะปานิ, อะหิ วิจฉิกา สะตะปะที อุณณานาภี สะระพู มูสิกา, กะตา เม รักขา กะตา เม ปะริตตา, ปะฏิกกะมันตุ ภูตานิ, โสหัง นะโม ภะคะวะโต, นะโม สัตตันนัง สัมมาสัมพุทธานัง ฯ

โมระปะริตตัง

อุเทตะยัญจักขุมา เอกะราชา
หะริสสะวัณโณ ปะฐะวิปปะภาโส,
ตัง ตัง นะมัสสามิ หะริสสะวัณณัง ปะฐะวิปปะภาสัง,
ตะยัชชะ คุตตา วิหะเรมุ ทิวะสัง,
เย พ๎ราห๎มะณา เวทะคุ สัพพะธัมเม,
เต เม นะโม เต จะ มัง ปาละยันตุ,
นะมัตถุ พุทธานัง นะมัตถุ โพธิยา,
นะโม วิมุตตานัง นะโม วิมุตติยา,
อิมัง โส ปะริตตัง กัต๎วา โมโร จะระติ เอสะนา ฯ

อะเปตะยัญจักขุมา เอกะราชา
หะริสสะวัณโณ ปะฐะวิปปะภาโส,
ตัง ตัง นะมัสสามิ หะริสสะวัณณัง ปะฐะวิปปะภาสัง,
ตะยัชชะ คุตตา วิหะเรมุ รัตติง,
เย พ๎ราห๎มะณา เวทะคุ สัพพะธัมเม,
เต เม นะโม เต จะ มัง ปาละยันตุ,
นะมัตถุ พุทธานัง นะมัตถุ โพธิยา,
นะโม วิมุตตานัง นะโม วิมุตติยา,
อิมัง โส ปะริตตัง กัต๎วา โมโร วาสะมะกัปปะยีติ ฯ

~~~~☆¤☆~~~~