ธัมมนิยามสูตร
เอวัมเม สุตังฯ เอกัง สะมะยัง ภะคะวา สาวัตถิยัง วิหะระติ เชตะวะเน อะนาถะปิณฑิกัสสะ อาราเม ฯ ตัต๎ระ โข ภะคะวา ภิกขู อามันเตสิ ภิกขะโวติฯ ภะทันเตติ เต ภิกขู ภะคะวะโต ปัจจัสโสสุงฯ ภะคะวา เอตะทะโวจะ
อุปปาทา วา ภิกขะเว ตะถาคะตานัง อะนุปปาทา วา ตะถาคะตานัง ฐิตา วะ สา ธาตุ ธัมมัฏฐิตะตา ธัมมะนิยามะตา สัพเพ สังขารา อะนิจจาติ ฯ ตัง ตะถาคะโต อะภิสัมพุชฌะติ อะภิสะเมติ อะภิสัมพุชฌิต๎วา อะภิสะเมต๎วา อาจิกขะติ เทเสติ ปัญญะเปติ ปัฏฐะเปติ วิวะระติ วิภะชะติ อุตตานีกะโรติ สัพเพ สังขารา อะนิจจาติฯ
อุปปาทา วา ภิกขะเว ตะถาคะตานัง อะนุปปาทา วา ตะถาคะตานัง ฐิตา วะ สา ธาตุ ธัมมัฏฐิตะตา ธัมมะนิยามะตา สัพเพ สังขารา ทุกขาติ ฯ ตัง ตะถาคะโต อะภิสัมพุชฌะติ อะภิสะเมติ อะภิสัมพุชฌิต๎วา อะภิสะเมต๎วา อาจิกขะติ เทเสติ ปัญญะเปติ ปัฏฐะเปติ วิวะระติ วิภะชะติ อุตตานีกะโรติ สัพเพ สังขารา ทุกขาติฯ
อุปปาทา วา ภิกขะเว ตะถาคะตานัง อะนุปปาทา วา ตะถาคะตานัง ฐิตา วะ สา ธาตุ ธัมมัฏฐิตะตา ธัมมะนิยามะตา สัพเพ ธัมมา อะนัตตาติ ฯ ตัง ตะถาคะโต อะภิสัมพุชฌะติ อะภิสะเมติ อะภิสัมพุชฌิต๎วา อะภิสะเมต๎วา อาจิกขะติ เทเสติ ปัญญะเปติ ปัฏฐะเปติ วิวะระติ วิภะชะติ อุตตานีกะโรติ สัพเพ ธัมมา อะนัตตาติฯ
อิทะมะโวจะ ภะคะวา ฯ อัตตะมะนา เต ภิกขู ภะคะวะโต ภาสิตัง อะภินันทุนติ ฯ
ภัทเทกรัตตคาถา
อะตีตัง นาน๎วาคะเมยยะ
นัปปะฏิกังเข อะนาคะตัง
ยะทะตีตัมปะหีนันตัง
อัปปัตตัญจะ อะนาคะตัง
ปัจจุปปันนัญจะ โย ธัมมัง
ตัตถะ ตัตถะ วิปัสสะติ,
อะสังหิรัง อะสังกุปปัง
ตัง วิทธา มะนุพ๎รูหะเย
อัชเชวะ กิจจะมาตัปปัง
โก ชัญญา มะระณัง สุเว
นะ หิ โน สังคะรันเตนะ
มะหาเสเนนะ มัจจุนา
เอวัง วิหาริมาตาปิง
อะโหรัตตะมะตันทิตัง,
ตัง เว ภัทเทกะรัตโตติ
สันโต อาจิกขะเต มุนิติฯ
ติลักขะณาทิคาถา
สัพเพ สังขารา อะนิจจาติ
ยะทา ปัญญายะ ปัสสะติ
อะถะ นิพพินทะติ ทุกเข
เอสะ มัคโค วิสุทธิยา
สัพเพ สังขารา ทุกขาติ
ยะทา ปัญญายะ ปัสสะติ
อะถะ นิพพินทะติ ทุกเข
เอสะ มัคโค วิสุทธิยา
สัพเพ ธัมมา อะนัตตาติ
ยะทา ปัญญายะ ปัสสะติ
อะถะ นิพพินทะติ ทุกเข
เอสะ มัคโค วิสุทธิยา
อัปปะกา เต มะนุสเสสุ
เย ชะนา ปาระคามิโน
อะถายัง อิตะรา ปะชา
ตีระเมวานุธาวะติ
เย จะ โข สัมมะทักขาเต
ธัมเม ธัมมานุวัตติโน
เต ชะนา ปาระเมสสันติ
มัจจุเธยยัง สุทุตตะรัง
กัณหัง ธัมมัง วิปปะหายะ
สุกกัง ภาเวถะ ปัณฑิโต
โอกา อะโนกะมาคัมมะ
วิเวเก ยัตถะ ทูระมัง
ตัตราภิระติมิจเฉยยะ
หิตวา กาเม อะกิญจะโน
ปะริโยทะเปยยะ อัตตานัง
จิตตักเลเสหิ ปัณฑิโต
เยสัง สัมโพธิยังเคสุ สัมมา จิตตัง สุภาวิตัง
อาทานะปะฏินิสสัคเค
อะนุปาทายะ เย ระตา
ขีณาสะวา ชุติมันโต
เต โลเก ปะรินิพพุตาติ ฯ
ไม่มีความคิดเห็น:
แสดงความคิดเห็น